2Cor 9 | PONPDN | STEP | A DUEN dodok on me saraui kan, i solar pan intin won komail.

2 Corinthians 9

1 A DUEN dodok on me saraui kan, i solar pan intin won komail. 2 Pwe i asa, me omail inon ion me mau, me i kin suaiki on men Masetonien, me men Akaia inon ion mepukat san ni par samalar, a komail kainon ion me toto. 3 I ap ilakiawei ri atail akan, pwe at kapin pa omail ender mal la ni mepukat, pwe komail en onop duen me i inda. 4 Pwe ma men Masetonien kai pan ian ia, ap konodi komail ni omail so onop, kit, se sota men inda komail, ap pan natnenok kila ni at liki wet. 5 Ari, i ap lamedar, en poeki ren ri atail akan, ren tion mo at kolan komail, pwen kaonopada pai wet, me komail inaukidar mas o, pwen pai melel eu, a iermen norok sued. 6 A iet me i inda: Me kin kamorok tikitik, pan dolun tikitik, a me kin kamorok toto, pan dolun me toto. 7 Amen amen duen a kileledier nan monion i; der kisa kol, de akpatik, pwe Kot kotin pok on me kin pein perenki kisakis. 8 A Kot me kotin manaman on en kalaudelan komail son en mak kan karos, pwe komail en kapwapwa ni son karos o ansau karos, ap kak on son en wiawia mau karos, 9 Duen a intinidier: A kamoredier, a kisakis a wei on me samamakan; a pun pan mimieta kokolata. 10 A me kin kotiki on saumat kisin war akan, o prot men mana, a pan katotoela omail war akan, o a pan kotin kawosada omail wan pun kan, 11 Pwe komail en kapwapwala ni son karos, pwen wiawia mau karos, me kin karedan kit, en danke Kot. 12 Pwe wiawia pan dodok wet kaidin sauas pan saraui kan ta, pwe me toto kin danke Kot. 13 Arail kapwaiada dodok wet kin kalinanada Kot pweki omail upai on kadede en ronamau en Kristus, o omail sapan kisakis on irail o on karos, 14 O ni arail nidinide kin komail, re kin anane komail pweki mak lapalap en Kot on komail. 15 Daken on Kot pweki a pai lapalap!